اليوم كان يوم سيئ بكل معنى الكلمة...
الواحد برد قلبو من زمان، لغاية ما صار ييجي اليوم انو لما تصير مدبحة، تحكي الله يرحمهم...تحسبهم شهداء و تكمل حياتك بدون ما ترجعلهم بفكرة أو تتذكرهم أو علقليل تترحم عليهم...
هادا وضع غزة من فترة الواحد بطل يحسبها، كان الواحد زعلان عشان خلص المعسل و الكولا، يمكن كان لازم نستنى كمان شوي عشان نعرف كيف شعور الواحد لما يشوف الكهربا كأنها ميزة لسكان غزة مش حق...و الحلو إنو بجيبو الكهربا بس عشان يحرقوا الباقي من الأجهزة الكهربائية ( أبشرو الكمبيوتر ضايلو شوي و ترتاحو من خلقتي لفترة بس الله بعرف قديش ) انا ما حكيتلكو...فش أي قطع كمبيوتر...البوكس الفاضي صار تلت أضعاف حقو...شباب غزة عملو بوكس خشب...بطل فيه إشي يتحط فيه...بس بتوقع هارد دسك مصنوع من علب الكنادر !!
عارف...طلعت عن الموضوع...الكهربا...مقدور عليها...أجداد أجدادنا ما كانو دبحين حالهم بلايستيشن...احنا بنشد على حالنا و بنصير زيهم....طلعت عن الموضوع كمان مرة...
ما كان حتى على بالي أكتب عن هيك موضوع بس اليوم صار موقف ونا عند الحلاق...كنت بقلب بالمحطات...محطتين ورا بعض حطوني بموقف...إنو مش إشي غير شكل...و كلو بنعرفو...بس الموقف كان تقيل عللي...المحطة الأولى الزهار بخلاف فكرتي عنو و رأيي قاعد بودع إبنو اللي استشهد اليوم بالإجتياح...الزلمة صابر و جامد بس فش طريقة اوصف فيها صبر رجل فقد ابنو...حتى لو ابنو راح على مكان كلنا بندعي الله يرزقنا اياه...و المحطة التانية بوش ماسك هلسيف و قاعد بدبك مع ملك مش عارف وين ( حتى لو بعرف طز )...زي ما بحكيلكم مش اشي جديد...بس اشي تقيل و مستفز !!
بتعرفو...71 واحد صارو ميتين بغزة...مش إغتيال..ولا طخ...ولا حتى من الزهق...71 واحد ماتو حالات مرضية مختلفة من السرطان للعضال...بس كانو محتاجين طريق عشان يطلعو على أي دولة يكملو علاج...بتخيل الناس اللي لسة مريضة بهادي الأمراض ( الله يجيرنا ) و هما انو الأعمار بإيد الله...بس برضو مسألة وقت عبين ما تنتهي حياتهم...يعني الواحد لما يكون مريض و بقدر يتعالج بكون أملو ضعيف...بس بدي أفهم ايش أملهم هدول ؟!
بالله ما نكدت عليكم ؟
سامحوني...بس احنا مش بعاد عن اللي بالمواجهو و الناس المريضة...غزة عبارة عن مكان بنستنى انموت فيه...لما تلاقي الناس اللي كنت بتاخد منهم الأمل و القوة...قاعدين بكذبو عشان يضل عندك هادا الأمل...بتصير تشك إنو فيه أمل...و أصلاً مين أمل هادي ؟!
بكرة أحسن إنشالله...اذا لأ يمكن اللي بعدو !!
